Кыргызстан менен Индия зер буюмдардын экспортун кеңейтүүнү макулдашты
Бишкекте экономика жана коммерция министринин орун басары Султан Акматов Индиянын Баалуу таштарды жана зергерчилик буюмдарын экспорттоону илгерилетүү кеңешинин президенти Сохил Котари менен жолукту.
Тараптар зергерчилик жана асыл таштарды иштетүү тармагындагы өнөр жай кооперациясын кеңейтүү, биргелешкен инвестициялык долбоорлорду ишке ашыруу, заманбап технологияларды киргизүү, адистерди даярдоо жана эки өлкөнүн ишкер чөйрөлөрүнүн кызматташтыгын чыңдоо маселелерин талкуулашты.
Кыргыз тарап индиялык делегацияга өлкөдөгү инвестициялык мүмкүнчүлүктөр, чет элдик инвесторлор үчүн түзүлгөн мамлекеттик колдоо механизмдери, ошондой эле зергерчилик тармагын өнүктүрүүгө багытталган салыктык жана бажылык жеңилдиктер тууралуу маалымат берди.
Жолугушуунун жыйынтыгында тараптар тажрыйба алмашуу, биргелешкен инвестициялык долбоорлорду илгерилетүү жана Кыргызстанда өндүрүлгөн даяр зергерчилик өндүрүмүн Евразия экономикалык биримдигинин, Европа Биримдигинин жана АКШнын рынокторуна чыгаруу боюнча кызматташууну өнүктүрүүгө макулдашышты.
