Караколдо туризм тармагындагы ишкердик долбоор колдоого алынды
Каракол шаарында ишкер Бакыт Ыбыкеев туристтер үчүн жайлуу A-frame үйлөрүн куруу долбоорун ишке ашырды. Долбоор аймактын туристтик инфраструктурасын өнүктүрүүгө жана эс алуучулар үчүн ыңгайлуу шарттарды түзүүгө багытталган. Бул тууралуу “Мамлекеттик финансылык холдинг” ачык акционердик коомунан кабарлашты.
Билдирүүгө караганда, аталган демилгени ишке ашыруу үчүн ишкерге “Мамлекеттик финансылык холдинг” ААК аркылуу 1 млн 300 миң сом өлчөмүндө жеңилдетилген каржылоо берилген.
Ага ылайык, туристтер үчүн жаңы эс алуу жайларын түзүү - Каракол шаарынын туристтик потенциалын жогорулатууга, кызмат көрсөтүү чөйрөсүн кеңейтүүгө жана жергиликтүү ишкердикти өнүктүрүүгө өбөлгө түзмөкчү.
Мындай долбоорлор аймактын экономикасын өнүктүрүүгө, ишкердик активдүүлүктү жогорулатууга жана жаңы жумуш орундарын түзүүгө салым кошот.
Туризм тармагындагы ишкердик демилгелерди колдоо жергиликтүү бизнести өнүктүрүүнүн жана региондордун экономикалык потенциалын чыңдоонун маанилүү багыттарынын бири болуп саналат.
