Кочкор-Атага 25 млн долларга мунайды кайра иштетүүчү завод курулат
Министрлер Кабинети менен “Борбордук Азия энергетикасы” ЖЧКсынын ортосунда Жалал-Абад облусунун Кочкор-Ата шаарында инновациялык мунайды кайра иштетүүчү заводду куруу жана иштетүү долбоорун ишке ашыруу боюнча инвестициялык келишимге кол коюу аземи болуп өттү.
Экономика жана коммерция министрлигинин маалыматына ылайык, Кыргызстан тараптан документке Экономика жана коммерция министри Бакыт Сыдыков, ал эми инвестор тараптан “Борбордук Азия энергетикасы” ЖЧКсынын башкы директору Шао Пейпей кол койду.
Министр белгилегендей, инвестициялык келишимде жылына 450 миң тонна мунай продуктуларын кайра иштетүүчү кубаттуулуктагы заманбап мунайды кайра иштетүүчү заводду куруу, кеминде 300 жаңы жумуш ордун түзүү каралган. Мында ишкананын кызматкерлеринин кеминде 90 %ын Кыргызстандын жарандары түзөт.
Өз кезегинде “Борбордук Азия энергетикасы” ЖЧКсынын башкы директору Шао Пейпей келишимдин алкагында инвестициялардын көлөмү 25 млн долларды түзөрүн белгиледи.
