Кыргызстанда жана коңшу мамлекеттерде көп азык-түлүктөр кымбаттады

Суу ресурстары, айыл чарба жана кайра иштетүү өнөр жайы министрлиги Кыргызстандын жана коңшу Орусия менен Казакстанда азык-түлүктөрдүн бааларына салыштырма мониторинг жүргүздү.

Министрликтин басма сөз кызматы билдиргендей, Кыргызстанда айрым негизги азык-түлүктөрдүн наркы өстү. Тактап айтканда, пияздын баасы 3,5%, сабиз 3%, тоок жумурткасы 2,7%, таңгакталган макарон азыктары 0,5%, жергиликтүү 1-сорттогу буудай уну 0,3%, тандыр нан 0,1%, уй эти (сулп этинен башкасы) 0,1% жана кумшекер 0,1%га кымбаттаган. Ал эми кой этинин баасы 0,2%га төмөндөгөн.

Казакстанстанда да баалар өскөн. Алардын арасында ак капуста — 0,9%, кой эти жана балык — 0,6%, кумшекер — 0,6%, кефир жана каймак май — 0,4%, пияз — 0,4%га кымбаттаган. Ошондой эле нан, картөшкө, күрүч, макарон азыктары, эт, сүт азыктары жана өсүмдүк майынын наркы 0,1–0,3% жогорулаган.

Ошондой эле Казакстанда айрым жашылча-жемиштердин баасы арзандаган. Бадыраң 4,6%, помидор 3,2%, сабиз 3,2%, жумуртка 0,4%, буудай уну 0,3%, тоок эти 0,2%, пастерленген сүт жана кара чайдын наркы 0,1%га төмөндөгөн.

Орусияда да азык-түлүк рыногунда өзгөрүүлөр байкалды. Кумшекердин баасы 1,8%, гречка 0,8%, сабиз, аш тузу жана 1-сорттогу буудай уну 0,4%га чейин жогорулаган. Ошондой эле макарон азыктары, нан, сүт, эт жана күн карама майынын баалары бир аз өскөн.

Ал эми бадыраң 6,3%, помидор 3,8%, тоок жумурткасы 1,3%, картөшкө жана пияз 0,4%, каймак май 0,2%, каймак жана сырдын баасы 0,1%га арзандаган.

Министрликтин маалыматына ылайык, мындай мониторингдер азык-түлүктөрдүн бааларын көзөмөлдөө, туруктуулукту камсыз кылуу максатында үзгүлтүксүз жүргүзүлүүдө.