Улуттук банк: өлкөдө нак акчанын көлөмү былтыркыдан 33 млрд сомго өстү
Кыргызстанда жүгүртүүдөгү акчанын жалпы көлөмү 1-июлга карата 317 млрд 26,2 млн сомду түздү. Бул тууралуу Улуттук банк билдирди.
Маалыматка ылайык, жүгүртүүдөгү акчанын ичинен 31 млрд 20,3 млн сом коммерциялык банктардын кассаларында, ал эми 286 млрд 5,9 млн сом банк тутумунан тышкары колдонууда болгон.
Өткөн жылдын ушул мезгилине салыштырмалуу жүгүртүүдөгү акчанын көлөмү 33 млрд 264,3 млн сомго же 13,2%га көбөйгөн.
2026-жылдын II чейрегинде коммерциялык банктардын кассаларына өлкө аймагынан 1 трлн 841 млрд 600,5 млн сом келип түшкөн. Бул көрсөткүч 2025-жылдын II чейрегине салыштырмалуу 496 млрд 744,4 млн сомго же 36,9%га өскөн.
Ал эми коммерциялык банктардын кассаларынан II чейректе 1 трлн 880 млрд 341,2 млн сом берилген. Бул өткөн жылдын ушул мезгилине караганда 496 млрд 906 млн сомго же 35,9%га көп.
Аймактар боюнча нак акча кайтарымдуулугу Бишкек шаарында 99,2%ды түзгөн. Ал эми Чүй облусунда бул көрсөткүч 100,2%, Баткен облусунда 100,2 %, Ош облусунда 100,1% болгон.
Тактап кетсек, жүгүртүүдөгү акча — бул калктын жана ишканалардын колундагы, ошондой эле коммерциялык банктардын (насыя берүүчү уюмдардын) кассаларында турган нак акча каражаттарынын жалпы көлөмү. Жүгүртүүдөгү акчанын көбөйүшү түздөн-түз калктын байлыгы көбөйдү дегенди билдирбейт. Анын өзгөрүшүнө инфляция, баалардын өсүшү жана товар жүгүртүүнүн көлөмү да таасир этет.
