Инвестиция салуудан мурун эске алчу жагдайлар — Финкөзөмөлдүн эскертүүсү
Каржы рыногун жөнгө салуу жана көзөмөлдөө кызматы жарандарды лицензиясы жок компаниялар сунуштаган "инвестициялык насыя" же "инвестициялоо келишимдерине" этият мамиле кылууга чакырды.
Мекеменин маалыматына ылайык, мындай сунуштар мыйзамсыз болушу мүмкүн. Айрыкча, эгер компаниялар 20% жана андан жогору кепилденген киреше убада кылса, алардын ишмердүүлүгүн кылдат текшерүү зарыл.
Белгиленгендей, акча каражатын инвестициялоодон мурда компаниянын лицензиясын Улуттук банктын же Финкөзөмөлдүн расмий сайттарынан текшерүүңүз шарт.
Ошондой эле жогорку киреше убада кылган жарнамаларга ишене бербөөнү жана шектүү сунуштар тууралуу Финкөзөмөлгө же укук коргоо органдарына кайрылууну эскертишти.
Мекеме жарандарды каржылык коопсуздугун сактоого жана инвестициялык чечим кабыл алардан мурда маалыматтарды кылдат текшерүүгө үндөдү.
