Кыргызстанга байланыштуу чектөөлөр: Евробиримдиктин санкция тизмесине кимдер кирди?
Европа Биримдиги Орусияга каршы киргизген 21-пакет санкциясында Кыргызстанга байланыштуу дагы бир катар чектөөлөрдү кабыл алды.
Ага ылайык, "ЭкоИсламикБанк" менен операцияларга тыюу салынып, Кыргызстандын үч компаниясына экспорттук чектөөлөр киргизилди. Ошондой эле Бишкекте катталган A7 тармагына байланыштуу эки түзүм санкциялык тизмеге кошулду.
Евробиримдиктин Кеңеши 23-июлда кабыл алган жаңы пакетке жалпысынан 218 субъект кирген. Алардын ичинен 48и жеке жактар, 170и уюмдар экени белгиленди.
Санкциялык документте "ЭкоИсламикБанк" ЖАКы Орусиянын Каржылык билдирүүлөрдү өткөрүп берүү системасы менен байланыштуу экени көрсөтүлгөн. Банк менен операцияларга тыюу салуу 2026-жылдын 13-августунан тарта күчүнө кирет.
Мындан тышкары, Бишкекте катталган үч компанияга карата кош багыттагы товарларга жана технологияларга байланыштуу экспорттук көзөмөл күчөтүлдү. Алар:
- "Нова проект" ЖЧКсы;
- "Рама Групп" ЖЧКсы;
- "Шисан" ЖЧКсы.
Евробиримдик бул компанияларды Орусиянын аскердик-өнөр жай комплексин колдоого байланыштуу чектөөлөр киргизилген уюмдардын катарына кошкон.
Ошондой эле санкциялык тизмеге Бишкекте катталган A7 тармагына байланыштуу түзүмдөр киргизилди. Алардын арасында A7 Nigeria, A7 Africa жана PilotFinance Ltd бар. Аталган түзүмдөргө карата операцияларга тыюу салуу 13-августтан тарта күчүнө кирери айтылды.
Тактап кетсек, A7 тармагы — эл аралык каржылык операциялар менен байланышкан бир нече юридикалык түзүмдөрдү камтыган тармак.
Евробиримдиктин жаңы санкция пакети негизинен Орусиянын энергетика, каржы, криптовалюта секторлоруна, аскердик-өнөр жай комплексине жана санкцияларды айланып өтүү механизмдерине каршы багытталган.
Ошол эле учурда документте Кыргызстанга карата жалпы экономикалык же банк тутумуна каршы санкциялар киргизилбегени, чектөөлөр конкреттүү уюмдарга тиешелүү экени белгиленген.
