Арашан породасындагы койлор Өзбекстанга экспорттолду
Арашан породасындагы 169 баш асыл тукум койдун алгачкы партиясы Өзбекстанга экспорттолду. Бул тууралуу Айыл чарба министрлигинен билдиришти.
Маалыматка ылайык, асыл тукум малды экспорттоо Кыргызстандын мыйзамдарынын талаптарына ылайык жүргүзүлөт. Экспорттолгон ар бир баш асыл тукум мал үчүн 17 миңден 20 миң сомго чейинки тиешелүү төлөмдөр мамлекеттик бюджетке түшөт.
Белгилей кетсек, учурда Кыргызстанда товардык багыттагы койлорду экспорттоого убактылуу чектөө киргизилген. Бул чара ички рынокто эттин баасынын туруктуулугун камсыздоо максатында кабыл алынган.
Ошол эле учурда Арашан породасындагы асыл тукум койлордун экспорту ички рыноктогу баага таасирин тийгизбейт. Анткени, бул жогорку генетикалык баалуулукка ээ асыл тукум мал болуп саналат. Аларды өстүрүү, селекциялоо, экспортко даярдоо жана сыртка чыгаруу олуттуу чыгымдарды талап кылат.
Бул багыт экспорттук потенциалды өнүктүрүүгө, асыл тукум мал чарбачылыгынын наркын жогорулатууга жана өлкөгө кошумча киреше алып келүүгө өбөлгө түзөт.
