Ноокаттын Алмалык айылына кирпич завод курулду
Ноокат районунун Т. Зулпуев айыл аймагына караштуу Алмалык айылында 9 гектар жер аянтына курулган жаңы кирпич заводунун курулуш иштери толугу менен аяктады. Бул тууралуу Ноокат райондук админстрациясынан билдиришти.
Маалыматка ылайык, заманбап өндүрүш ишканасы ишке киргенден кийин күнүнө 200 000 даана кирпич өндүрүүгө мүмкүнчүлүк түзүлөт. Бул завод жергиликтүү калкты жаңы жумуш орундар менен камсыз кылууга, курулуш материалдарына болгон суроо-талапты камсыздоого жана аймактын социалдык-экономикалык өнүгүүсүнө чоң салым кошот.
Учурда заводду ишке киргизүүгө акыркы даярдыктар көрүлүп, жакынкы күндөрү жаңы өндүрүш ишканасынын расмий ачылыш аземин өткөрүү пландалууда.
Жаңы кирпич заводу – Алмалык айылынын өндүрүштүк мүмкүнчүлүгүн кеңейтүүгө жана жергиликтүү экономиканы өнүктүрүүгө багытталган маанилүү долбоорлордун бири.
