Кениядан импорттолгон розалардан карантиндик зыянкеч аныкталды
Кениядан Кыргызстанга импорттолгон розалардан карантиндик зыянкеч – калифорниялык трипс аныкталды. Бул тууралуу Айыл чарба министрлигине караштуу Өсүмдүктөрдү химиялаштыруу, коргоо жана карантин департаментинен билдиришти.
Департаменттин Борбордук лабораториясы жүргүзгөн изилдөөлөрдүн жыйынтыгында зыянкеч Кениядан келген 26 миң 390 даана кесилген розадан алынган үлгүлөрдөн табылган. Калифорниялык трипс Евразия экономикалык биримдигинин аймагында карантиндик мааниге ээ зыянкечтердин катарына кирет.
Бул факт боюнча Департаменттин Чүй-Бишкек башкармалыгынын адистери белгиленген тартипте ыкчам фитосанитардык чараларды көрүштү.
Карантиндик зыянкечтин өлкө аймагына киришине жана андан ары таралышына жол бербөө максатында импорттолгон өсүмдүк продукцияларына фитосанитардык көзөмөл улантылууда.
