Кыргызстан менен Пакистан сооданын көлөмүн 200 миллион долларга жеткирүүнү көздөшүүдө
Пакистан менен Кыргызстан жакынкы бир-эки жылдын ичинде эки тараптуу сооданын көлөмүн 200 миллион долларга чейин жеткирүүнү максат кылышты. Бул тууралуу Пакистандын премьер-министри Шахбаз Шариф 2-сентябрда “Ынтымак Ордодо” Кыргызстандын президенти Садыр Жапаров менен болгон жолугушууда билдирди.
Анын айтымында, тараптар ошондой эле транзиттик коридорлорду өнүктүрүү жана чыңдоо боюнча макулдашышты. Пакистан Кыргызстанга транспорттук объектилерди, ошондой эле Карачи жана Гвадар портторун пайдаланууну сунуштады.
"Бул бизге Кытай жана Өзбекстан аркылуу транзиттик каттамдарды жана коридорлорду ачууга жардам берет", – деди Шахбаз Шариф.
Ал транзиттик каттамдарды өнүктүрүү боюнча үч тараптуу жана төрт тараптуу макулдашуулар буга чейин эле ишке ашырылып жатканын билдирди. Атап айтканда, Пакистанга жүктүн алгачкы партиясы жөнөтүлүп, анын айтымында, ал өлкөгө ийгиликтүү жеткирилген.
Премьер-министр тараптар макулдашууларды ишке ашырууга байланыштуу бир катар маселелерди чечип, транзиттик ташууларды тездетүү үчүн тиешелүү механизмдерди чыңдоосу зарыл экенин кошумчалады. Анын айтымында, бул процессте Кытай маанилүү роль ойнойт.
