Ошто жасалма акциздик марка чапталган суусундуктар аныкталды
Мамлекеттик салык кызматы Ош шаарында жүргүзүлгөн рейддик салыктык көзөмөл учурунда жасалма акциздик маркалары бар алкоголсуз суусундуктарды аныктады.
Салык кызматынын маалыматына ылайык, алкоголсуз продукция өндүргөн объектти текшерүүдө жасалма акциздик марка чапталган 2670 даана суусундук табылып, тартып алынды.
Бул факт боюнча тиешелүү акт түзүлүп, материалдар укуктук баа берүү үчүн укук коргоо органдарына өткөрүлүп берилет.
Салык кызматынан эскертишкендей, жасалма акциздик маркасы бар 100 бирдикке чейинки акциздик продукцияны саткандарга 100 миң сом айып пул каралган. Ал эми мындай продукциянын саны 100 бирдиктен ашса, 7 жылга чейин эркиндигинен ажыратуу түрүндөгү кылмыш жоопкерчилиги каралышы мүмкүн.
Мамлекеттик салык кызматы ишкерлерди акциздик маркасы жок же жасалма маркасы бар продукцияны сатпоого жана сактабоого, ошондой эле акциздик маркалардын аныктыгын текшерүүгө чакырды.
