Өзгөндө күрүчтүн кабыгынан курулуш материалдары өндүрүлүүдө
Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Ош облусунун Өзгөн районундагы бир катар ишканалардын жана өндүрүш объектилеринин ишмердүүлүгү менен таанышты.
Министрликтин маалыматына ылайык, иш сапардын алкагында "Кожомкулов" жеке ишканасы, "Кыргыз балык чарба" ишканасынын Өзгөн филиалы, райондук ветеринардык лаборатория, "Эко Өзгөн күрүчү" муниципалдык ишканасы жана сүттү кайра иштетүү цехи көрүлдү.
Өзгөчө көңүл "Эко Өзгөн күрүчү" ишканасына бурулду. Анда күрүчтү кайра иштетүүдөн калган дан кабыгы таштандыга чыгарылбастан, кайра иштетилип, курулуш материалдарын, анын ичинде кыш өндүрүүдө пайдаланылат.
Ошондой эле чийки зат менен камсыздоо, продукцияны кайра иштетүү, лабораториялык көзөмөл, сактоо, таңгактоо жана сатуу маселелери талкууланды.
Рысгүл Акимжанова ишканаларды өз ара байланышкан бирдиктүү өндүрүштүк чынжыр катары өнүктүрүү маанилүү экенин белгиледи. Бул аймакта кошумча наркты көбөйтүүгө, ата мекендик продукциянын сапатын жана атаандаштыкка жөндөмдүүлүгүн жогорулатууга шарт түзөрү айтылды.
