Садыр Жапаров: Пакистандын деңиз порттору Кыргызстан үчүн дүйнөлүк соода жолдоруна чыгуучу жол
Бишкек шаарында 2-сентябрда, Президент Садыр Жапаров жана Пакистандын премьер-министри Мухаммад Шахбаз Шариф сүйлөшүүлөрдүн жыйынтыгы боюнча басма сөз үчүн билдирүү жасашты.
“Экономика кыргыз-пакистан өнөктөштүгүнүн негизги таянычы болууга тийиш. Ошондуктан биз өз ара товар жүгүртүүнү көбөйтүү, соода номенклатурасын кеңейтүү жана инвестицияларды тартуу боюнча системалуу кадамдарды жасоону макулдаштык.
Биз фармацевтика, айыл чарба, энергетика, жеңил өнөр жай, туризм, санариптик экономика, виртуалдык активдер жана башка тармактарда биргелешкен долбоорлорду ишке ашырууга даярдыгыбызды билдирдик”, - деди президент.
Пакистандын деңиз порттору Кыргызстан үчүн Түштүк Азиянын рынокторуна, андан ары дүйнөлүк соода жолдоруна чыгуучу табигый жол болуп саналат.
Өз кезегинде, Кыргызстан Пакистан үчүн Борбордук Азиянын рынокторуна жана андан ары кеңири евразиялык мейкиндикке чыгуучу маанилүү транспорттук көпүрөлөрдүн бири боло алат.
