Таластын болгар калемпири Россия менен Казакстанга экспорттолууда
Талас облусунун Манас районунда "Ласточка" сортундагы болгар калемпирин жыйноо иштери башталды.
Айыл чарба министрлигинин маалыматына ылайык райондо аталган өсүмдүк 1 350 гектар аянтка эгилген. Учурда түшүм жыйноо иштери активдүү жүрүп, орточо түшүмдүүлүк гектарына 200-250 центнерди түзүүдө.
Манас району Талас облусунда айыл чарбасы өнүккөн аймактардын бири. Райондогу жалпы айдоо аянты 18,8 миң гектарды түзөт. Быйыл дыйкандар жашылча өсүмдүктөрүн өстүрүүгө өзгөчө көңүл бурушкан.
Учурда Манас районунда өстүрүлгөн болгар калемпири ички рынокко сатылуу менен катар Россия жана Казакстанга экспорттолууда.
Болгар калемпиринин сатуу баасы бүгүнкү күндө орточо эсеп менен килограммына 40-45 сомду түзүүдө.
Жогорку түшүмдүүлүк жана тышкы рыноктогу суроо-талап болгар калемпирин райондогу дыйкандар үчүн кирешелүү айыл чарба өсүмдүктөрүнүн бирине айландырууда.
Учурда райондо түшүм жыйноо иштери уланууда.
