Садыр Жапаров: Акыркы төрт жылда экономика орточо 10,2% өстү
Өлкө башчы Садыр Жапаров бүгүн Жогорку Кеңештин жыйыныда Министрлер Кабинетинин айрым мүчөлөрүнүн ант берүү аземинде катышып, коомчулукка кайрылып, сөз сүйлөдү.
Өз сөзүндө ал акыркы жылдары Кыргызстан өнүгүүнүн жаңы этабына чыкканын белгилеп, экономика, инфраструктура, энергетика, айыл чарба, транспорт жана логистика тармактарындагы ийгиликтүү иштерге токтолду.
Жапаровдун айтымында, акыркы төрт жылда өлкө экономикасынын орточо жылдык өсүшү 10,2%ды, ал эми 2026-жылдын январь-июль айларында ички дун продукциясынын реалдуу өсүшү 11,1%ды түздү.
Мындан тышкары, мамлекет башчысы Кыргызстан акыркы жылдары эл аралык аренадагы ордун бекемдеп жатканын белгилеп, ШКУ саммитин, “ШКУ+” жолугушуусун жана VI Дүйнөлүк көчмөндөр оюндарын мисал келтирди.
“Кыргызстанды күчтүү экономикасы бар, заманбап инфратүзүмү өнүккөн, жарандарына сапаттуу билим алууга, эмгектенүүгө, ишкердик жүргүзүүгө жана татыктуу жашоого кеңири мүмкүнчүлүк түзгөн мамлекетке айландыруу – ар бирибиздин ыйык жана жалпы милдетибиз. Ошол эле учурда бийлик бутактарынын ортосунда пикирлердин айырмачылыгы болушу табигый көрүнүш. Талаш-тартыштар да болушу мүмкүн. Бирок кандай гана маселе болбосун, анын өзөгүндө мамлекеттин кызыкчылыгы жана элдин жыргалчылыгы турушу керек!” деп билдирди, мамлекет башчы.
Ошондой эле, өлкө башчысы коомдо пикир келишпестикти кастыкка, талкууну тирешүүгө, ар түрдүү маселелерди коомду бөлүп-жаруучу куралга айлантууга эч кимдин укугу жок экендигин баса белгиледи.
“Мамлекеттик кызматтарда коррупциялык көрүнүштөр болсо, далилденген, негизделген фактылар менен элдин алдына алып чыксаңыздар, албетте, мага эң чоң жардам берген болосуздар. Мен сиздер тарапта болом. Сиздерди колдойм!” - деп кошумчалады, Садыр Жапаров.
Сөзүнүн соңунда, эл өкүлдөрүнө жаңы сессияда ийгиликтүү жана жемиштүү иш алып барууну каалады.
