"Абердин-ангус" асыл тукум малдарын жылдык 3 % жеңилдетилген насыя аркылуу алууга болот
Фермерлер Абердин-ангус породасындагы асыл тукум малды жылдык 3 % жеңилдетилген насыя аркылуу сатып алуу мүмкүнчүлүк түзүлдү. Мындай билдирүүнү Суу ресурстары, айыл чарба жана кайра иштетүү өнөр жайы министрлигинен кабарлашты.
Билдирүүгө караганда, насыя алуу үчүн “АБанк” же “Элдик Банкка” кайрылууга болот. Насыя 5 жылга чейин, жеңилдетилген мезгили 12 айга чейин берилет. 500 миң сомго чейин күрөөсүз, ал эми 500 миң сомдон 20 млн сомго чейин күрөө менен насыя алуу мүмкүнчүлүгү каралган.
Малды сатып алууда - асыл тукум күбөлүгү, ветеринардык маалымкат, идентификациялык жана келип чыгышын тастыктаган тиешелүү документтер талап кылынат. Ал эми фермерлердин асыл тукум чарба статусуна ээ болушу милдеттүү эмес. Негизги талаптын бири — малды багуу жана тоюттандыруу үчүн тиешелүү шарттардын, карантиндик зонанын жана ветеринардык тейлөөнүн болушунда.
Банк тарабынан насыя жактырылгандан кийин фермерлер “Кыргыз Агрохолдинг” менен келишим түзүп, Абердин-ангус породасындагы асыл тукум малды сатып ала алышат.
Бардык башка суроолор боюнча 1210 кыска номерине байланышып, толук маалымат алууга болот.
