Данияр Амангелдиев - ЕЭК Кеңешинин жыйынына катышты
КРнын Министрлер Кабинетинин төрагасынын биринчи орун басары Данияр Амангелдиев 9-сентябрда Москвада өткөн Евразиялык экономикалык комиссиянын Кеңешинин кезектеги жыйынына катышты.
Жыйындын жүрүшүндө айыл чарба жана кайра иштетүү өнөр жай комплексин өнүктүрүү, ЕАЭБге мүчө мамлекеттердин өз ара соодасы, транспорттук жана энергетикалык инфраструктураны өнүктүрүү жана башка багыттар боюнча 48 маселе каралды.
Өкмөттүн басма сөз кызматы билдиргендей, 2025-жылы Кыргызстандын ЕАЭБ өлкөлөрү менен товар жүгүртүүсү 5,9 млрд долларды түзүп, 2020-жылга салыштырмалуу 2,4 эсеге өскөн.
Жыйында транспорттук инфраструктураны өнүктүрүүгө жана ЕАЭБге мүчө мамлекеттердин артыкчылыктуу интеграциялык долбоорлорун ишке ашырууга өзгөчө көңүл бурулду.
Атап айтканда, транспорт чөйрөсүндөгү артыкчылыктуу интеграциялык инфраструктуралык долбоорлордун тизмесине өзгөртүүлөр киргизүү маселеси каралды. КРнан тизмеге – “Луговой – Балыкчы” темир жол участогун электрлештирүү долбоору, “Балыкчы – Кочкор – Кара-Кече – Макмал – Жалал-Абад” темир жолун куруу долбоору, ошондой эле Бишкек шаарынын түндүк айланма жолун реконструкциялоо долбоору киргизилди.
Мындан тышкары, ЕАЭБдин жалпы электр энергетикалык рыногундагы соода, интеграцияланган маалыматтык системаны өнүктүрүү, медициналык буюмдардын коопсуздугун жана сапатын камсыз кылуу маселелери талкууланды.
Жыйындын жыйынтыгы боюнча каралган маселелер боюнча тиешелүү чечимдер кабыл алынды.
