Нарындын Мин-Булак айыл аймагында мамлекетке 4,9 млн сом зыян келтирилген
Нарын облусунун Нарын районундагы Мин-Булак айыл аймагында эки комбайн сатып алууда мамлекетке 4 млн 945 миң сом өлчөмүндө зыян келтирилгени аныкталды. Бул тууралуу УКМКнын басма сөз кызматынан кабарлашты.
Маалыматка ылайык, мыйзам бузуу мамлекеттик сатып алуулардын жүрүшүндө аныкталган. Келтирилген зыяндын көлөмү Кыргызстандын Финансы министрлигинин Ички аудит кызматынын корутундусу менен белгиленген.
Учурда бул факты боюнча кылмыш иши козголуп, анын алкагында тергөө-ыкчам иш-чаралары жүргүзүлүүдө. Тергөө иштеринин жыйынтыгы менен тиешелүү кызмат адамдарынын аракеттерине укуктук баа берилип, мамлекетке келтирилген зыяндын ордун толтуруу боюнча чаралар көрүлөт.
