Тамеки продукциясын контрабандалык жол менен алып өтүүгө аракет кылган жаран кармалды
УКМК жана Мамлекеттик бажы кызматынын кызматкерлери ыкчам-издөө иш-чараларынын жүрүшүндө КРнын аймагы аркылуу өтүп жаткан товарларды контрабандалык жол менен ташуунун трансчек аралык каналын аныктап, ага бөгөт койду.
УКМКнын маалыматына таянсак, жүргүзүлгөн атайын операциянын жүрүшүндө 2026-жылдын 6-сентябрында “Ош” эл аралык аэропортунда “Esse Change” тамеки продукциясын ири өлчөмдө контрабандалык жол менен алып өтүүгө аракет кылган учурда чет өлкөлүк жаран Р.И.А. кармалып, тергөө иштери аяктаганга чейин УКМКнын тергөө абагына киргизилди.
Кармалган жаран кылмыштуу ишмердигин жашыруу максатында үчүнчү өлкөлөр аркылуу түзүлгөн аба каттамы менен учуп келип, Ош шаары аркылуу контрабандалык жүктү жер үстүндөгү транспорт каражаты менен коңшу мамлекетке алып өтүүнү көздөгөнү аныкталды.
Бул факты боюнча КРнын Кылмыш-жаза кодексинин “Экономикалык контрабанда” беренесинде каралган кылмыштын белгилери боюнча кылмыш иши козголуп, КРнын бюджетине келтирилген зыяндын өлчөмү аныкталууда.
Учурда УКМК тарабынан кылмыштуу схеманын башка катышуучуларын аныктоо боюнча иштер улантылууда.
