Ысык-Ата районунда айнек пакеттерин жана жарык чагылдыруучу айнектерди өндүрүү ишке кирди
Экономика жана коммерция министрлигинин көмөгү менен айнек пакеттерин жана жарык чагылдыруучу айнектерди өндүрүүгө адистешкен кыргыз-өзбек биргелешкен «ГЛАСС ЦЕНТР» ишканасы ачылды. Мекемеден кабарлагандай, ачылыш аземи кече 12-сентябрда өткөрүлүп, ага экономика жана коммерция министринин орун басары Беназир Нурланова катышты.
Долбоорду ишке ашырууга 482 млн сом инвестиция салынган. Ишкананын өндүрүштүк кубаттуулугу айына 12 миң чарчы метрге же жылына 144 миң чарчы метрден ашык продукцияга жетет.
Беназир Нурланованын айтымында, долбоордун ишке ашырылышы өндүрүштүк кооперацияны өнүктүрүүгө жана курулуш тармагындагы жеткирүү чынжырларын мындан ары кеңейтүүгө шарт түзөт.
Учурда ишканада 100дөн ашык жумуш орду түзүлүп, кызматкерлердин басымдуу бөлүгүн жаш адистер түзөт. Келечекте жумуш орундарынын санын 300гө чейин көбөйтүү пландалууда. Бул калктын иш менен камсыз болушун жогорулатууга жана аймактагы экономикалык жигердүүлүктү арттырууга өбөлгө түзөт.
Өндүрүш чыгарылып жаткан продукциянын сапатын жана атаандаштыкка жөндөмдүүлүгүн жогорулатууга, ассортиментин жана сатуу рынокторун кеңейтүүгө багытталган.
