Россияда доллардын курсу 85 рублден ашып, максимумга жетти
5-октябрда Россиянын банктар аралык рыногунда доллардын курсу 85 рублден ашты. Бул көрсөткүч 25-сентябрдан берки эң жогорку деңгээл болуп саналат. Москва убактысы боюнча саат 12:53тө америкалык валютанын котировкасы 85,03 рублга жеткен. Ошол убакка карата доллардын курсу 1,2%дан ашык, башкача айтканда 1 рублдан көбүрөөк өсүп кеткен.
Адистер рублдин начарлашына карабастан, орто мөөнөттүү келечекте Россиянын улуттук валютасы кескин арзандабайт деген пикирде.
Lenta.ru маалымдагандай, рублди колдоого бир катар факторлор таасир этиши мүмкүн. Алардын арасында Жакынкы Чыгыштагы кырдаалдын кайрадан курчушуна байланыштуу мунайдын баасынын жогору болушу, ошондой эле салык мезгилинин таасири бар. Анын алкагында экспорттоочулар тарабынан бюджетке пайдалуу кендерди казып алууга салык, пайда салыгы жана акциздер боюнча түшүүлөр көбөйөт.
“Цифра брокер” компаниясынын аналитиги Александр Дудниковдун айтымында, Россиянын Борбордук банкынын катуу акча-кредит саясаты да рублди колдойт. Анын белгилешинче, жогорку негизги чен рублдеги аманаттардын жана депозиттердин жагымдуулугун сактап калууда.
Финансы университетинин стратегиялык жана инновациялык өнүгүү кафедрасынын доценти Михаил Хачатуряндын болжолуна ылайык, төртүнчү чейректе доллардын курсу 80–85 рублдун тегерегинде болушу мүмкүн.
