Кыргызстанда бир күндө 17 мектеп жана 3 бала бакча ачылды
Бүгүн, Кыргызстан боюнча 17 жаңы мектеп жана 3 бала бакча, жалпы 20 социалдык объект пайдаланууга берилди. Алар Бишкек шаарында, Ош жана Манас шаарларында, ошондой эле Ноокен, Тон, Алай жана Айтматов райондорунда курулган.
Бишкек шаарындагы Патрис Лумумба көчөсүндө курулган №83 орто мектептин ачылышына МинКаб төрагасы Адылбек Касымалиев катышты. Калган 16 мектеп жана 3 бала бакчанын ачылышы онлайн форматта өттү. Ачылган 17 мектептин 10у Бишкек шаарында жайгашкан.
Иш-чарада Адылбек Касымалиев билим берүүнү өнүктүрүү мамлекеттин артыкчылыктуу багыттарынын бири экенин белгиледи. Анын айтымында, акыркы жылдары мугалимдердин айлык акысы жогорулатылып, окуу китептери менен камсыздоо маселесин чечүүгө 8,5 млрд сом бөлүнгөн.
Министрлер Кабинетинин Төрагасы жаңы мектептерди куруу менен катар билим берүүнүн сапатын жогорулатуу да маанилүү экенин белгиледи.
“Эгер бүгүн Кыргызстандын спутниги космоско чыкса, эртең ал жакка Кыргызстандын уул-кыздары учушу керек! Мугалим билим берет. Бирок силердин ордуңарга эч ким окуй албайт!” - деп Адылбек Касымалиев окуучуларга кайрылды.
