ӨКӨФ жана IFC Кыргызстан - Өзбекстан ортосундагы туризмди өнүктүрүүнү талкуулады
Өзбек-Кыргыз өнүктүрүү фондунун (ӨКӨФ) жетекчилиги Эл аралык каржы корпорациясынын (IFC) өкүлдөрү менен туризм тармагындагы кызматташтыктын келечегин талкуулады. Бул тууралуу аталган фонддун басма сөз кызматынан кабарлашты.
Билдирүүгө караганда, өткөн жумада Өзбек-Кыргыз өнүктүрүү фондунун кеңсесинде ӨКӨФтүн жетекчилиги менен Эл аралык каржы корпорациясынын (IFC) өкүлдөрүнүн жумушчу жолугушуусу болуп өткөн.
Жолугушуунун жүрүшүндө тараптар туризм тармагындагы кызматташуунун келечегин, инвестиция тартуу мүмкүнчүлүктөрүн жана Кыргызстан менен Өзбекстандын ортосундагы өлкөлөр аралык кызматташууга басым жасоо менен биргелешкен долбоорлорду ишке ашыруу маселелерин талкуулашкан.
Жолугушуунун катышуучулары өлкөнүн өзгөчө табигый ландшафттарынан улам, Кыргыз Республикасынын жаратылыш жана экологиялык туризмди өнүктүрүү үчүн чоң потенциалы бар экенин белгилешти.
Мындан сырткары, туристтик инфраструктураны өнүктүрүүгө жана бул тармактын инвестициялык жагымдуулугун жогорулатууга өзгөчө көңүл бурулуп, жыйынтыгында тараптар мындан аркы кызматташууга кызыкдар экендиктерин билдиришти.
