“Ак-Жол” пунктунда товарларды мыйзамсыз ташып өтүү аракетине бөгөт коюлду
Мамлекеттик салык кызматынын кызматкерлери “Ак-Жол” товарларды эсепке алуу пунктунда мамлекеттик чек ара аркылуу эл керектөөчү товарларды мыйзамсыз ташып өтүү аракетине бөгөт коюшту. Бул тууралуу тталган мекеменин маалымат кызматынан кабарлашты.
Билдирүүгө караганда, текшерүүнүн жүрүшүндө 4 миң 100 даана товар Казакстандан Кыргызстандын аймагына тиешелүү коштомо документтери жок ташылып келгени аныкталды.
Товарларды ташып өтүүгө белгиленген көзөмөл тартибин бузуу жолу менен акы алып, жүктөрдү аз-аздан ташыган адамдар тартылганы белгилүү болду. Аныкталган товарлардын жалпы баасы 800 миң сомдон ашат.
Бул факты боюнча тиешелүү актылар түзүлүп, транспорт каражатына мөөр басылып, бардык жагдайлар такталганга чейин айып короого киргизилди.
Текшерүүнүн жыйынтыгы боюнча ишкерге - Кыргыз Республикасынын мыйзамдарында каралган жоопкерчилик чаралары, анын ичинде административдик айып пул салуу жана товарларды кармоо чаралары колдонулушу мүмкүн. Мындан тышкары, салыктык милдеттенмелер кошумча эсептелиши божомолдонууда.
