Кен казууга лицензия берүү тартиби өзгөрөт
Бүгүн Жогорку Кеңеш жер казынасын пайдаланууну жөнгө салууга багытталган мыйзам долбоорун биринчи окууда кабыл алды. Мыйзам долбооруна ылайык, кен казууга лицензия берүү тартибин өркүндөтүү, электрондук аукциондорду киргизүү жана мамлекеттик экспертизалардын мөөнөтүн кыскартуу сунушталууда.
Жаратылыш ресурстары, экология жана техникалык көзөмөл министринин орун басары Амантур Турсуниязов баяндама жасап, өзгөртүүлөр “Жер казынасы жөнүндө” мыйзамдагы карама-каршылыктарды жоюуга жана лицензиялоо механизмдерин жакшыртууга багытталгандыгын билдирди.
Мыйзам долбоорунун милдети - жергиликтүү мамлекеттик администрация тарабынан кум-шагыл аралашмасын жана чопо-топуракты казып алууга укуктарды каттоо жөнүндө күбөлүктү берүүнү жокко чыгаруу, лицензияланган ишке контролду күчөтүү жана мыйзамдык талаптардын сакталышын камсыз кылуу үчүн күрөөлүк укуктук мамилелерге тыюу салууну киргизүү болуп саналат. Ошондой эле мамлекеттик экспертизаларды өткөрүү мөөнөтүн кыскартуу, жер казынасын пайдалануу укугун берүүдө электрондук аукциондорду өткөрүүнү камсыздоо жана жер казынасын пайдаланууну лицензиялоо процессин жөнгө салуу каралууда.
Талкуу учурунда депутаттар лицензия берүүдө жаралган тоскоолдуктар, кен казган компаниялардын жерди калыбына келтирүү боюнча жоопкерчилиги жана жергиликтүү бюджеттерге түшүүчү салыктар тууралуу маселелерди көтөрүштү.
Депутат Бакытбек Чойбеков кен казуудан түшкөн салыктардын жергиликтүү бюджетке бөлүнүүчү үлүшүн сактоо зарылдыгын белгиледи. Министрдин орун басары бул багытта өзгөрүү болбой турганын билдирди.
Ошондой эле депутат Улан Сариев жер казынасын пайдалануучулардын ортосунда талаш-тартыштарды болтурбоо үчүн бир аймакка эки лицензия берүүгө жол бербөө керектигин айтты.
