Баткенде продукцияларды иштеп чыгуу жана окутуу борбору ачылды
Баткен шаарында "Бир айыл - бир продукт" долбоорунун алкагында жаңы борбор ишке кирди. Ал Жусуп Баласагын атындагы Кыргыз улуттук университетинин Баткен аймактык көп тармактуу институтунун базасында ачылды. Бул тууралуу президенттин Баткен облусундагы ыйгарым укуктуу өкүлүнөн билдиришти.
Маалыматка ылайык, борбор "Бир айыл - бир продукт +1" коомдук бирикмеси менен окуу жайдын кызматташтыгында түзүлгөн. Негизги максаты - жергиликтүү өндүрүүчүлөрдү колдоо, окутуу, продукциянын сапатын жакшыртуу жана жергиликтүү товарларды жайылтууга көмөктөшүү.
Жаңы борбор ишкерлер, өндүрүүчүлөр, билим берүү мекемелери, мамлекеттик органдар жана эл аралык уюмдардын кызматташуусуна аянтча болот. Ал жерде өндүрүүчүлөр жаңы продукцияны иштеп чыгуу жана тажрыйба алмашуу боюнча практикалык иштерди жүргүзө алат.
Белгилей кетсек, борборго БУУнун Дүйнөлүк азык-түлүк программасы тарабынан керектүү жабдуулар берилди. Алдыда "Бир айыл - бир продукт" бирикмеси АРИС менен биргеликте аймакта айыл чарба продукциясын кайра иштетүүчү ишканаларды ачууну пландап жатат.
