9 айда Салык кызматкерлерине карата 261 кайрылуу келип түштү

2026-жылдын 9 айында Салык кызматынын борбордук аппаратына салык органдарынын кызматкерлерине карата жеке жана юридикалык жактардан 261 кайрылуу түшкөн. Анын ичинен 136 жарандардын жана салык төлөөчүлөрдүн арыз-даттануулары, 44 укук коргоо органдарынын сунуштамалары жана 81 кайрылуу Салык кызматынын башкармалыктарынынан келген. Бул тууралуу Салык кызматынын маалымат кызматы маалымдайт.

Кайрылууларды кароонун жыйынтыгында төмөнкүлөр аныкталды:

• фактылар 58 кайрылуу боюнча толугу менен тастыкталган;
• фактылар 2 кайрылуу боюнча жарым-жартылай тастыкталган;
• фактылар 187 кайрылуу боюнча тастыкталган эмес;
• 6 материал укуктук баа берүү үчүн укук коргоо органдарына өткөрүлүп берилген.

"Салык системасынын 165 кызматкери тартиптик жоопкерчиликке тартылды. 112 кызматкерге эскертүү, 38 кызматкерге сөгүш жарыяланса, 7 кызматкерге катуу сөгүш берилген. 4 кызматкер иштен бошотулса, 2 кызматкер кызмат ордунан төмөндөтүлүп, 2 кызматкер ротацияланган", - деп жазылат маалыматта.

Кайрылууну кантип берүүгө болот?

Жарандар жана салык төлөөчүлөр салык органдарынын кызматкерлеринин мүмкүн болгон мыйзам бузуулары тууралуу төмөнкү жолдор менен билдире алышат:

• Салык кызматынын борбордук аппаратынын же тиешелүү аймактык салык органынын юридикалык дарегине почта аркылуу жазуу жүзүндө кайрылуу жөнөтүү же жалпы бөлүмгө жеке тапшыруу;
• Салык кызматынын борбордук аппаратынын же тиешелүү аймактык салык органынын электрондук почтасына кайрылуу жөнөтүү;
• Салык кызматынын борбордук аппаратынын же аймактык салык органынын жетекчилигинин жеке кабыл алуусуна жазылуу;
• Салык кызматынын борбордук аппаратынын 0312 62 11 13 ишеним телефонуна чалуу;
• 0779 613 189 WhatsApp номерине билдирүү жөнөтүү;
• Салык кызматынын жетекчилигине +996 502 433 733 WhatsApp номери аркылуу кайрылуу;
• «Пикир» системасын колдонуу.