Кореялык компания өлкөдө өндүрүш долбоорун ишке ашырууну көздөп жатат
КР Президентине караштуу Инвестициялар боюнча улуттук агенттик түштүк кореялык HWAYA INC компаниясынын өкүлдөрү менен жолугушту. Бул тууралуу аталган агенттиктен билдирди.
Мекемеден белгилешкендей, анда инвестициялык кызматташтыктын келечеги жана Кыргызстанда өндүрүш ишканасын түзүү мүмкүнчүлүктөрү талкууланды.
Тараптар өнөр жай өндүрүшүн өнүктүрүү, ишкананы эркин экономикалык аймактын (ЭЭА) аймагына жайгаштыруу жана кыргыз-корей инвестициялык кызматташтыгын кеңейтүү мүмкүнчүлүктөрүн карап чыгышты.
HWAYA INC компаниясы Кыргыз Республикасында өндүрүш долбоорун ишке ашыруу мүмкүнчүлүгүн карап жатат. Долбоорго болжолдонгон инвестициянын көлөмү 10 млн АКШ долларын түзөт.
Жолугушууда өндүрүш үчүн аянтчаны тандоо, тиешелүү инфраструктура менен камсыз кылуу жана продукцияны Борбор Азия өлкөлөрүнүн рынокторуна экспорттоо маселелери талкууланды.
Буга чейин, 2026-жылдын 16–22-сентябрында Инвестициялар боюнча улуттук агенттик менен HWAYA INC компаниясынын ортосунда кызматташтык жөнүндө меморандумга кол коюлган.
Документ инвестициялык өз ара аракеттенүүнү өнүктүрүүгө, өнөр жай демилгелерин илгерилетүүгө жана эркин экономикалык аймактар жаатындагы кызматташтыкты бекемдөөгө багытталган.
