Майлуу-Суу шаарын өнүктүрүүгө 1 млрд сомдон ашык каражат багыттоо пландалууда
Өлкө башчысы Садыр Жапаров бүгүн Жалал-Абад облусуна болгон иш сапарынын алкагында Майлуу-Суу шаарынын 2021–2026-жылдардагы социалдык-экономикалык өнүгүүсүнүн жыйынтыктары жана келечектеги пландары менен таанышты. Бул тууралуу президенттин администрациясы билдирди.
Маалыматка ылайык, шаарда инфраструктураны жаңылоо, жолдорду оңдоо, социалдык объектилерди өнүктүрүү жана инвестиция тартуу багытында иштер жүргүзүлүүдө. 2021-жылга салыштырмалуу 2025-жылы шаар бюджетинин аткарылышы 196,1%га өскөн.
2025-жылы президенттин Турукташтыруу фондунун каражаттарынын эсебинен шаарда 9,7 чакырым жол асфальтталган.
2027-жылга карата шаарды өнүктүрүүнүн артыкчылыктуу багыттары белгиленди. Даярдалган жол картасына ылайык, төмөнкү долбоорлорду ишке ашыруу пландалууда:
- жолдорду оңдоо жана инфраструктураны өнүктүрүү үчүн 585 млн сом;
- туризмди, анын ичинде экотуризмди өнүктүрүүгө 215 млн сом;
- жашыл жана коопсуз шаарды калыптандырууга 125 млн сом;
- шаардын тарыхый-архитектуралык көрүнүшүн сактоого жана сырткы келбетин жакшыртууга 75 млн сом.
Жалпысынан аталган багыттар боюнча 1 млрд сом каражат багыттоо пландалууда.
Мындан тышкары, № 76 кесиптик лицейдин базасында жогорку окуу жайын ачуу мүмкүнчүлүгү да каралууда.
Ошол эле учурда шаарда калкты таза ичүүчү суу менен камсыз кылуу, лампа заводунун ишин кайра жандандыруу, мунай өндүрүүдөн түшкөн каражаттарды жергиликтүү бюджетке чегерүү жана турак жай курууга жер тилкелерин бөлүү маселелери актуалдуу бойдон калууда.
Шаардын инфраструктурасын мындан ары өнүктүрүү жана тургундардын жашоо шарттарын жакшыртуу негизги милдеттердин катарында белгиленди.
