Бишкекте курулуш кранын кооптуу пайдаланган компанияга айып салынды
Бишкек шаарында курулуш кранын коопсуздук талаптарын бузуу менен пайдаланган "Кент Строй" ЖЧКсына 200 миң сом айып пул салынды. Бул тууралуу Курулуш министрлиги билдирди.
Маалыматка ылайык, жарандардын кайрылуусунун негизинде Юдахин көчөсү, 64 дарегинде курулуп жаткан 19 кабаттуу турак үй текшерилген. Учурда объектте 16-кабаттын жабуусун орнотуу иштери жүрүп жатат.
Текшерүү учурунда курулуш материалдарын ташууга арналган кран өз багыты боюнча пайдаланылбаганы жана жумушчулардын бири кранга чыкканы аныкталган. Бул курулуш ченемдерин жана коопсуздук талаптарын одоно бузуу катары бааланган.
Жыйынтыгында "Кент Строй" ЖЧКсына 200 миң сом, ал эми техникалык көзөмөл адисине 17 миң сом айып пул салынды. Ошондой эле компанияга мыйзам бузууларды жоюу жана коопсуздук талаптарын сактоо боюнча милдеттүү көрсөтмө берилди.
Мындан тышкары, объекттин прорабынан жазуу түрүндө түшүнүк кат алынып, эскертүү берилди. Кран машинистин күбөлүгүнөн ажыратуу маселесин кароо үчүн тиешелүү органга расмий кат жөнөтүлөрү маалымдалды.
