Энергетика министри “Газпромго” каржылоону 1,5 млрд сомго көбөйтүүнү сунуштады
Энергетика министри Таалайбек Ибраев 7–10-октябрда Санкт-Петербургда өтүп жаткан XIV эл аралык газ форумуна катышууда. Иш-чаранын алкагында ал “Газпром” компаниясынын жетекчиси Алексей Миллер менен жолугушту.
Министрликтен билдиргендей, жолугушууда тараптар Кыргызстанга газдын жеткирилиши жана «Газпром Кыргызстан» ишканасынын Кыргызстандын газ ташуу жана бөлүштүрүү системаларын күз-кыш мезгилине даярдоо боюнча аракеттери талкууланды. Ошондой эле газды камсыз кылуу боюнча инвестицияны көбөйтүү, күйүүчү жана майлоочу материалдар боюнча маселе көтөрүлдү.
Ибраев жылдык каржылоону 1,5 миллиард сомго чейин көбөйтүү, газдын баасын туруктуу кармоо жана калкты үзгүлтүксүз жаратылыш газы менен камсыз кылуу сунушун берди.
Жолугушуунун жыйынтыгында Кыргызстан менен “Газпром” кызматташууну улантып, кышында газ менен туруктуу камсыз кылуу боюнча макулдашууга жетишишти.
Маалымат үчүн:
Кыргызстанда жаратылыш газын импорттоо жана бөлүштүрүү иштерин “Газпром Кыргызстан” компаниясы жүргүзөт. Бул компания — Орусиянын “Газпром” ишканасына таандык.
