Дүйнөлүк "Bvlgari" бренди Кыргызстан менен кызматташууга кызыгууда
Министрлер Кабинетинин төрагасынын биринчи орун басары Данияр Амангельдиев дүйнөгө белгилүү италиялык "Bvlgari" компаниясынын өкүлдөрү менен жолугушуу өткөрдү. Бул тууралуу Өкмөттүн Басма сөз кызматынан билдиришти.
Делегациянын курамында компаниянын туруктуу өнүгүү жана корпоративдик социалдык жоопкерчилик боюнча директору Элеонора Риццуто, ошондой эле корпоративдик каржы жана тобокелдиктерди башкаруу боюнча директору Энрико Фрицци болду.
Жолугушууда тараптар өнөктөштүк мамилелерди түзүү, зергерчилик буюмдарын өндүрүү жаатындагы кызматташтык жана Кыргызстанда биргелешкен долбоорлорду ишке ашыруу мүмкүнчүлүктөрүн талкуулашты.
Данияр Амангельдиев дүйнөлүк ири бренддердин Кыргызстанга кызыгуусу стратегиялык мааниге ээ экенин белгилеп, мамлекет инвесторлорго колдоо көрсөтүүгө даяр экенин билдирди.
Ошондой эле ал делегация өкүлдөрүнө өлкөдө жүргүзүлүп жаткан экономикалык реформалар, бизнес үчүн мыйзамдарды либералдаштыруу жана зергерчилик тармагындагы мүмкүнчүлүктөр тууралуу маалымат берди.
Өз кезегинде "Bvlgari" компаниясынын өкүлдөрү Кыргызстандын инвестициялык мүмкүнчүлүктөрүнө кызыгып жатканын билдирип, өлкөдөгү экономиканын өнүгүүсүнө оң баа беришти.
Жолугушуунун жыйынтыгында тараптар консультацияларды улантуу жана кызматташуунун конкреттүү багыттарын иштеп чыгуу боюнча макулдашышты.
