Жыргалаңда жаңы көмөк чордондору жана кабелдик линиялар ишке киргизилди
Жыргалаң өрөөнүндө 35/10 кВ “Үч Чоку” жаңы көмөк чордонунун курулушу аяктап, 12,8 км жаңы кабелдик чубалгылар тартылып, 4 даана 10 кВ көмөк чордону орнотулду. Бул тууралуу Энергетика министрлигинен билдиришти.
“Ала-Тоо резорт” мамлекеттик ишканасынын директору Жаркынбек Максутов энергетиктердин Жыргалаң аймагында аткарган иштерин белгилеп, аларга ыраазычылыгын билдирди. Ал аймактын татаал жана оор шарттарында, тоолуу рельефте жана карлуу-шамалдуу аба ырайында энергетиктер көрсөткөн кесипкөйлүккө жана чыдамкайлыкка басым жасады.
Максутов аткарылган жумуштардын аймактын келечегине салган маанилүү салым экенин белгилеп, алдыда дагы жаңы милдеттер бар экенин жана энергетиктер аларды да жоопкерчилик менен аткараарына ишенээрин билдирди.
