"Газпром Кыргызстан" газ эсептегичтердин көрсөткүчтөрүн берүүнү эскертти
Көп кабаттуу үйлөрдө жашаган айрым абоненттер газ эсептегичтеринин көрсөткүчтөрүн азыркыга чейин өткөрбөй жатышканын "Газпром Кыргызстан" ЖЧКсы маалымдады.
Маалыматка ылайык, ар бир абонент табигый газды жеткирүү жана пайдалануу эрежелерине ылайык эсептегичтин көрсөткүчтөрүн ай сайын өткөрүп турууга милдеттүү. Компания көрсөткүчтөр өзгөрбөсө да, аларды сөзсүз түрдө тапшыруу керектигин эскертет.
"Эгерде абонент үйүндө жашабай, узак убакыт бою газ колдонбосо, бул тууралуу gazprom.kg сайтындагы “жеке кабинет” аркылуу же мобилдик тиркеме аркылуу тиешелүү арыз калтырып, кабарлашы зарыл", — деп билдиришти компаниядан.
Колдонуудагы эрежелерге ылайык, көрсөткүчтөр берилбеген учурда төлөм орточо айлык керектөөнүн негизинде эсептелет. Эгерде эсептегичтен маалымат үч айдан ашык убакыт өткөрүлбөсө, "Газпром Кыргызстан" керектөөнүн көлөмүн бекитилген нормативдер боюнча эсептөөгө укуктуу. Бул кийинчерээк кайра эсептөө зарылдыгын жаратышы мүмкүн.
Ашыкча түйшүктөрдөн сактануу үчүн эсептегичтин көрсөткүчтөрүн ар айдын 15инен 30уна чейин өткөрүп туруу сунушталат. Аны төмөнкү жолдор менен жасоого болот:
- "Газпром Кыргызстан" мобилдик тиркемеси аркылуу;
- gazprom.kg сайтындагы абоненттин “жеке кабинети” аркылуу;
- 4444 байланыш борборунун телефону аркылуу (уюлдук телефондон чалуу акысыз);
- WhatsApp номери: 0701 68 07 07;
- Telegramдагы @gazpromkg_bot чат-боту аркылуу.
