Өлкөнү күйүүчү май менен туруктуу камсыздоо чаралары күчөтүлдү
Энергетика министрлиги өлкөдөгү күйүүчү-майлоочу майлардын абалын күн сайын көзөмөлдөп, ички рынокту үзгүлтүксүз камсыз кылуу боюнча иштерди жүргүзүп жатканын билдирди.
Маалыматка ылайык, дүйнөлүк энергетикалык рыноктогу өзгөрүүлөр, Жакынкы Чыгыштагы геосаясий чыңалуу, эл аралык логистикалык тобокелдиктер жана мунайдын дүйнөлүк баасынын өсүшү ички рынокко таасирин тийгизип жатат.
Өлкөнүн энергетикалык коопсуздугун камсыздоо максатында Министрлер кабинети жана Энергетика министрлиги Орусия, Казакстан, Беларусь, Азербайжан, Өзбекстан жана Түркмөнстанга кайрылуулар жөнөтүп, эл аралык кызматташтыкты кеңейтүү боюнча сүйлөшүүлөр жүргүзүлүүдө.
Ички өндүрүштү өнүктүрүү багытында мамлекеттик органдардын өкүлдөрү «Жунда» мунай иштетүүчү заводуна жана «Кыргызнефтегаз» ишканасына барып, өндүрүш иштери менен жеринен таанышышты.
Иш сапарлардын жүрүшүндө президенттин өзгөчө тапшырмалар боюнча өкүлү Бакыт Төрөбаев, Министрлер Кабинетинин төрагасынын орун басары Эрлист Акунбеков жана энергетика министри Алтынбек Рысбеков өндүрүш көлөмүн көбөйтүү жана ишканалардын ишинин натыйжалуулугун жогорулатуу боюнча тиешелүү тапшырмаларды беришти.
Мындан тышкары, ички рыноктогу баа кырдаалы көзөмөлгө алынганы айтылды. Монополияга каршы жөнгө салуу кызматы нефтетрейдерлер менен үзгүлтүксүз жолугушууларды өткөрүп, баа саясаты, логистика боюнча маселелерди талкуулап, рыноктун туруктуулугун камсыздоо чараларын көрүүдө.
Энергетика министрлиги өлкөнү күйүүчү-майлоочу майлар менен жетиштүү көлөмдө камсыз кылуу жана алардын үзгүлтүксүз жеткирилишин камсыздоо боюнча иштер пландуу негизде уланып жатканын, жалпы абал мамлекеттин туруктуу көзөмөлүндө экенин билдирди.
