Энергетика министрлиги 252 жаңы трансформатор орнотот
Энергетика министрлиги 2026-2027-жылдардын күз-кыш мезгилине даярдык алкагында өлкөнүн электр тармактарын жаңылоодо. Бул тууралуу министрликтин маалымат кызматы билдирди.
Маалыматка караганда, 6-10/0,4 кВ чыңалуудагы 252 жаңы күч трансформатору орнотулат. Жабдуулардын баары "Энергетика тармагын модернизациялоо жана туруктуу өнүктүрүү" долбоору менен жеткирилген. Орнотуу иштерин "Кыргызстан улуттук электр тармагы" ААК жүргүзөт.
Жаңы трансформаторлор керектөө өсүп жаткан тилкелерге жана эскирген жабдуулардын ордуна коюлат. Бөлүштүрүүдө тармактын техникалык абалы жана жүктөм эске алынат.
Модернизациялоо электр тармагынын кубаттуулугун жогорулатууга, жабдууларга түшкөн жүктү азайтууга жана кышкы пик учурунда резерв түзүүгө мүмкүндүк берет. Өзгөчө көңүл жаңы конуштарга жана курулуш жигердүү жүргөн райондорго бурулат.
Жаңы жабдуулар 25 жылга чейин кызмат кылууга эсептелген.
