Бишкекте 80 млн сомго заманбап терапия корпусу ачылды
7-октябрда №1 шаардык клиникалык ооруканада жаңы терапия бөлүмү ачылды. Корпус "Ас-Сафа" коомдук бирикмесинин каржылоосу менен курулду. Бул тууралуу Саламаттык сактоо министрлиги маалымдады.
Билдирүүгө караганда, 4 кабаттуу имараттын аянты 1 530 чарчы метр. Долбоордун наркы - 80 млн сом.
Жер төлөдө - лабораториялар, кир жуучу жай жана техникалык бөлмөлөр. Биринчи кабатта - кароо, хирург, терапевт, ЛОР, офтальмолог кабинеттери, УЗИ, ЭКГ жана процедуралык бөлмө.
Экинчи жана үчүнчү кабатта терапия бөлүмүнүн палаталары, интенсивдүү терапия залы, буфет, ординатордук жана дарыгерлердин кабинеттери жайгашкан. Бөлүм толугу менен жабдылган.
Ачылышта саламаттык сактоо министринин орун басары Гүлбара Ишенапысова мындай долбоорлор борбордо гана эмес, аймактарда да ишке ашып жатканын белгилеп, "Ас-Сафа" фондунун салымын жогору баалады.
"Ас-Сафа" фондунун төрагасы шейх Мухаммад Аль-Шайя жаңы корпус медициналык жардамдын сапатын жогорулатууга салым кошот деп ишенерин билдирди.
