Швейцария айылдарды колдоо үчүн 2.2 млн доллар бөлөт
Швейцария климаттын өзгөрүшүнө туруктуулукту жогорулатуу жана табигый кырсыктар коркунучун азайтуу үчүн эң аялуу айылдык жамааттарды колдоого 2.2 млн доллар бөлөт.
Бүгүн, 28-июнда, Швейцариянын элчиси Оливье Бангертер жана БУУнун Бүткүл дүйнөлүк азык-түлүк программасынын Кыргызстандагы директору Кодзиро Накай Бүткүл дүйнөлүк азык-түлүк программасынын 2018-2022-жылдарга карата Өлкөлүк стратегиялык планын ишке ашырууга Швейцариянын салымы жөнүндө макулдашууга кол коюшту.
Иш-чаралар Ош, Баткен жана Нарын облустарында жүргүзүлүп, 50 миңге жакын аялуу үй чарбаларына колдоо көрсөтөт. Ошондой эле кургакчылык, сел, суу ташкындары сыяктуу табигый кырсыктардын кесепеттери менен каршы күрөшүүгө системалык ыкманы иштеп чыгуу үчүн жергиликтүү бийлик органдарына жана мекемелерге мамлекеттик деңгээлде жардам берет.
Бенефициарларга өз убагында ишенимдүү климаттык маалымат берилип, кырсыктарга туруштук берүү үчүн пландаштыруу боюнча колдоо, инфраструктуралык колдоо көрсөтүлөт
Калктын аярлуу катмарларына азык-түлүк жана малдын коопсуздугун камсыз кылуу үчүн инструменттер, ошондой эле алардын кырсыктарга жана кризистерге даярдыгын жогорулатуу боюнча эң эффективдүү чараларды үйрөтөт.
Демилге бир жыл ичинде ишке ашырылмакчы.
