Туристтик компаниянын директору 307 миң сомдук алдамчылыкка айыпталууда
Бишкекте туристтик компаниянын директору алдамчылыкка шектелип кармалды. Бул тууралуу Бишкек шаарынын ички иштер башкы башкармалыгынан билдиришти.
Маалыматка ылайык, 2-мартта Биринчи май райондук милициясына О.Н. аттуу жаран арыз менен кайрылып, "MIRELLE & COMPANY" ЖЧКсынын директору М.К. аттуу жаранга карата чара көрүүнү өтүнгөн.
Арыз ээсинин айтымында, компаниянын директору туристтик тур уюштуруу үчүн акча каражатын алган, бирок өзүнө алган милдеттенмелерин аткарган эмес.
Бул факт боюнча Кылмыш-жаза кодексинин 209-беренеси (алдамчылык) боюнча кылмыш иши козголгон. Текшерүүдө шектүү 307 миң сом өлчөмүндөгү акча каражатын алып, жабырлануучуга олуттуу материалдык зыян келтиргени аныкталган.
Натыйжада М.К. аттуу жаран убактылуу кармоочу жайга киргизилди.
Учурда милиция бул иш боюнча башка жабырлануучуларды аныктоо максатында ыкчам-издөө иш-чараларын улантууда.
Эгерде жарандар бул факты боюнча кандайдыр бир маалыматка ээ болсо же жабыркаса, Биринчи май райондук милициясына же 102 номерине билдирүү зарыл.
