2023-жылы Бишкекте Кытайдын грантына беш жол түйүнү курулат
Келерки жылы Бишкекте беш транспорттук жол түйүнү курулат. Бул тууралуу Жогорку Кеңештин Транспорт, коммуникациялар, архитектура жана курулуш боюнча комитетинин жыйынында мэриянын Транспорт жана жол инфраструктурасын өнүктүрүү департаментинин директору Максат Нусувалиев билдирди.
Анын айтымында, бул долбоор кытай грантынын эсебинен ишке ашырылат.
«Жол түйүндөрү светофорсуз, айланма көпүрөлөрсүз болот. Учурда «Бишкекбашкыархитектура» ишканасы тарабынан берилген эскиздер кытай тарап менен макулдашылып жатат. Алардын курулушу 2023-жылдын март айында башталат», – деди ал.
Нусувалиев ошондой эле быйыл борбор калаада кытай грантынын эсебинен 70 чакырым жол салынганын да кошумчалады.
