Баткенде экономикалык мүмкүнчүлүктөрдү кеңейтүүчү долбоор башталды

Баткен облусунда АРИС аркылуу “Коомдоштуктардын демилгеси боюнча улуттук долбоор” ишке ашат. Бул тууралуу облустагы өкүлчүлүк маалымдады.

Бүгүн, Баткен шаарында долбоордун алкагында тегерек стол өтүп, жыйынтыгында АРИС менен жергиликтүү бийлик органдары 2026–2029-жылдар аралыгында биргелешип иш алып баруу боюнча меморандумга кол коюшту.

Долбоордун максаты – климаттын өзгөрүшүнө туруктуу социалдык-экономикалык инфраструктурага жеткиликтүүлүктү жогорулатуу жана аялдар менен жаштардын экономикалык мүмкүнчүлүктөрүн кеңейтүү.

Баткен облусунан долбоорго Самаркандек, Исхак Полотхан жана Кең-Талаа айыл аймактары тандалып алынган.

Жалпысынан долбоорго 27 млн доллар бөлүнгөн. Анын 25 млн доллары  Дүйнөлүк банктын гранты болсо, 2 млн долларды “Эрте билим берүү боюнча өнөктөштүк” фонду бөлгөн.

Долбоордун алкагында жылуулук, таза суу, электр менен камсыздоо жана ирригация системаларын оңдоо үчүн айылдык аймактарга гранттар каралган.