Дархандык ишкерлер жеңилдетилген насыя боюнча маалымат алышты
Ысык-Көл облусунун Жети-Өгүз районундагы Дархан айылында жергиликтүү ишкерлер үчүн маалыматтык сессия өттү. Бул тууралуу Айыл чарба министрлигинин эл аралык долбоорлорун ишке ашыруу кызматы билдирди.
Иш-чара "Климаттын өзгөрүшүнө туруктуу айыл чарба кошумча нарк чынжырларын өнүктүрүү" долбоорунун алкагында уюштурулду.
Жолугушууда ишкерлерге айыл чарба өндүрүмдөрүн сактоо, кайра иштетүү жана логистиканы өнүктүрүүгө багытталган жеңилдетилген насыялык каржылоонун мүмкүнчүлүктөрү тууралуу маалымат берилди.
Долбоордун адистери каржылоонун шарттары, мөөнөттөрү, багыттары, арыз берүү тартиби жана инвестициялык сунуштарды даярдоо боюнча түшүндүрмө беришти. Ошондой эле катышуучулар өздөрүн кызыктырган суроолорун берип, адистерден жооп алышты.
Сессиянын жүрүшүндө ишкерлердин бизнес-долбоорлору жана аларды жеңилдетилген каржылоонун жардамы менен өнүктүрүү мүмкүнчүлүктөрү талкууланды. Жыйынтыгында каржылоого кызыкдар жана өнүгүү мүмкүнчүлүгү бар бир катар ишкерлер аныкталды.
Долбоордун өкүлдөрү ишкерлерге инвестициялык сунуштарды даярдоодон тартып, документтерди толтуруу жана банкка кайрылуу иштерине чейин консультациялык жана техникалык колдоо көрсөтөрүн белгилешти.
