Аялдарга ипотекалык насыя берүүгө 65 млн доллар багытталат
Мамлекеттик ипотекалык компания менен “Элдик Банк” Азия өнүктүрүү банкынын колдоосу менен ишке ашырылып жаткан турак жай долбоору боюнча кайра каржылоо тууралуу башкы макулдашууга кол коюшту.
Мамлекеттик ипотекалык компаниянын маалыматына ылайык, аялдарды колдоого багытталган долбоордун жалпы каржылоо көлөмү 65 млн долларды түзөт. Макулдашууга МИКтин башкармалыгынын төрагасы Талант Жекшенов жана “Элдик Банктын” башкармалыгынын төрагасы Уланбек Ногаев кол коюшкан.
Долбоордун биринчи баскычында Кыргызстандын аймактарында (Бишкек жана Ош шаарларын кошпогондо) аялдар үчүн ипотекалык насыя берүү программасы ишке киргизилет. Ал алгач өнөктөш катары “Элдик Банк” аркылуу ишке ашырылып, кийин башка банктар да кошулат.
Программага МИКтин турак жай алуу боюнча расмий тизмеде турган жана талаптарга жооп берген жарандар катыша алышат. Катышуучулар катталган күнүнө жараша кезеги менен чакырылат.
МИК билдиргендей, программа тууралуу маалыматтар мекеменин расмий сайтында жарыяланып, талаптарга жооп берген жарандарга SMS жана электрондук почта аркылуу кошумча кабарланат.
