«Альянс Алтын» Талас районундагы өрттү өчүрүүгө жардам берди
Талас районундагы Кара-Ой менен Сасык-Булак айылдарынын ортосундагы өрттү өчүрүүгө «Альянс Алтын» кен ишканасы жардам берди. Бул тууралуу компаниянын басма сөз кызматы билдирди.
Такталгандай, Кара-Ой айылынын тургундары 20-мартта өздөрүнүн айылы менен Сасык-Булак айылынын ортосунда өрт чыкканын билдиришкен. Жарандардын айтымында, өрт бат эле куураган өсүмдүктөргө жайылып, Талас дарыясынын жанындагы алма бакка жеткен.
«Альянс Алтын» ишканасынын кызматкерлеринин ыкчам аракеттеринин аркасында өрттү локалдаштырууга жана анын андан ары жайылышын алдын алууга мүмкүн болду.
«Жергиликтүү тургундар «Альянс Алтын» компаниясынын техникасы тегеректеги өрттөрдү өчүрүү үчүн көп жолу колдонулуп жатканын белгилешүүдө.Алардын айтымында, мындай колдоо болбогондо кесепеттери мындан да оор болушу мүмкүн эле», - деп кошумчалашты компаниядан.
Белгилей кетсек, өрт локализацияланып, жарым сааттын ичинде өчүрүлгөн. Алдын ала версия боюнча өрт отко этиятсыз мамиле кылуудан келип чыккан; жабыркагандар болгон жок.
