«Альянс Алтын» өнүктүрүү фонду Талас медициналык колледжинин имаратын оңдоого жардам берди
Талас медициналык колледжинин имаратынын фасады «Альянс Алтын» өнүктүрүү фондунун колдоосу менен жаңыланды. Ишке 3,5 миллион сом бөлүнгөнүн фонддун маалымат кызматы билдирди.
Талас медициналык колледжинин директорунун милдетин аткаруучу Мээрим Малдыбаеванын айтымында, имарат 70 жыл мурун курулуп, бир да жолу оңдоп-түзөөдөн өткөн эмес.
«70 жылдан бери бул жерде эч кандай оңдоп-түзөө иштери жүргүзүлгөн эмес. Фонддун жардамы үчүн ыраазычылык билдиребиз. Имараттын фасадын оңдоп, тосмолорун жаңыртканга жардам беришти. Бул иштердин аркасында колледждин имараты заманбап көрүнүшкө ээ болду», - деди ал.
Фонд «Альянс Алтын» алтын өндүрүүчү компаниясынын ишмердүүлүгүнөн каржыланат. 2015-жылдан бери компания фондго 1,2 миллиард сом которгон. Бул каражат мектептерди, бала бакчаларды, медициналык мекемелерди, спорттук имараттарды, маданий демилгелерди, жолдорду жана жарыктандыруу системаларын курууга жана колдоого жумшалды.
