ОПЕК Кыргызстандын суу тармагына каражат бөлөт
Жогорку Кеңештин кароосуна Кыргызстан менен Эл аралык өнүктүрүү боюнча ОПЕК (Мунай экспорттоочу өлкөлөр тарабынан мунай өндүрүү квоталарын көзөмөлдөө максатында түзүлгөн эл аралык өкмөттөр аралык уюм) фонду ортосунда түзүлгөн кредиттик макулдашууну ратификациялоо тууралуу мыйзам долбоору киргизилди.
"Суу менен камсыздоого жана санитарияга жалпы жеткиликтүүлүк (1-фаза)" программасын каржылоого тиешелүү бул документке 2025-жылдын 23-сентябрында Бишкек шаарында кол коюлган.
Негиздеме-маалымкатка ылайык, долбоор калкты ичүүчү суу менен камсыздоону жакшыртууга, санитардык шарттардын сапатын жогорулатууга, оорулардын деңгээлин төмөндөтүүгө, ошондой эле инфраструктураны климаттык коркунучтарга ыңгайлаштырууга багытталган. Программа Чүй, Ысык-Көл жана Ош облустарындагы 126 калктуу пунктту камтып, 425 миңден ашуун тургунду таза суу менен камсыздоону көздөйт.
Долбоордун негизги компоненттерине суу менен камсыздоого инвестиция салуу, санитардык шарттарды жакшыртуу, жергиликтүү өз алдынча башкаруу органдарын колдоо, кызмат көрсөтүүлөрдүн сапатын жогорулатуу жана кийинки этаптар үчүн долбоордук-сметалык документтерди иштеп чыгуу кирет.
Долбоорду каржылоо республикалык бюджеттен кошумча чыгымдарды талап кылбайт жана колдонуудагы мыйзамдарга каршы келбейт.
