Айыл чарбадагы рекорддор
Кыргызстанда 2025-жылы айыл чарба тармагында бир катар рекорддук көрсөткүчтөр катталды. Бул тууралуу айыл чарба министри Бакыт Төрөбаев Сузак районундагы Фермерлерди тейлөө борборунун ачылышында билдирди.
Анын айтымында, мамлекеттик колдоонун натыйжасында кыргыз фермерлери быйыл бир нече тармакта рекорддук көрсөткүчтөрдү көрсөтүшкөн. Алсак,
- Жайыл районунда гектарынан 120 тонна помидор алынып, дүйнөлүк рекорд коюлду;
- Лейлекте гектарынан 113 тонна пияз жыйналды;
- Манас районунда гектарынан 120 тоннага чейин болгар калемпири өндүрүлдү;
- Кочкордо гектарына 35 тонна картошка түшүмү жыйналган;
- Ак-Талаадагы фермерлер “Ангус” породасында жогорку натыйжа көрсөтүштү — 10 айлык торпок 100 миң сомдон сатылып, эң чоң буканын салмагы 1,5 тоннага жетти.
Төрөбаев белгилегендей, айыл чарбаны өнүктүрүүдө бир катар артыкчылыктуу багыттар аныкталды. Алардын катарында, Санариптик “Фермерди тейлөө борборлорунун” системасын түзүү, “Акылдуу” ирригация системасын киргизүү, айыл чарбадагы чийки заттарды кайра иштетүүнү кеңейтүү, “Талаадан – дүйнөгө” долбоору аркылуу экспортту күчөтүү бар.
Министрдин айтымында, бул иш-чаралардын натыйжасында Кыргызстандын айыл чарбасы экспортко багытталган, инновациялуу жана атаандаштыкка жөндөмдүү тармакка айланат.
