«Дүйнөлүк каражат топтоо күнү» белгиленет
Кыргызстанда 27-октябрдан 31-октябрга чейин «Дүйнөлүк каражат топтоо күнү-2025» маалыматтык-билим берүү иш-чарасы өткөрүлөт. Мындай маалыматты Улуттук банктын Финансылык сабаттуулук бөлүмүнөн кабарлашты.
Бул масштабдуу иш-чаранын максаты – коомчулуктун көңүлүн финансылык сабаттуулукту жогорулатуу маселесине буруу, каражат топтоону өнүктүрүү, финансылык коопсуздукка үйрөтүү жана алгылыктуу финансылык чечимдерди кабыл алуу жөнүндө маалымат берүү болуп саналат.
Бүткүл дүйнөлүк каражат топтоо күнүнүн алкагында финансылык жарманке, ачык сабактар, лекциялар, интерактивдүү оюндар, финансылык мекемелерге экскурсиялар жана ачык эшик күндөрү, сынактар жана викториналар уюштурулат. Иш-чаралардын толук тизмеси Улуттук банктын расмий сайтына жана финансылык сабаттуулук боюнча www.finsabat.kg сайтына жайгаштырылат.
