МИК: Ипотекалык батирлердин баалары
Ипотекалык батирлердин баасы алардын жайгашкан аймагына жана чарчы метрине жараша аныкталат. Бул тууралуу Мамлекеттик ипотекалык компаниянын (МИК) Чүй облусундагы өкүлчүлүгүнүн башчысы Мырзагүл Сардарбекова “Кабар” агенттигинин түз эфиринде билдирди.
Анын айтымында, учурда Бишкектеги Маликов көчөсүндөгү жана Кустанай жана Волков көчөлөрүнүн кесилишиндеги батирлердин чарчы метри — 78 705 сом. Ал эми “Ынтымак” турак жай комплексинде — 87 450 сом, Күн-Туу айылында — 83 078 сом.
Сардарбекова белгилегендей, батирлер үй-бүлөнүн мүчөлөрүнүн санына жана кирешесине жараша бөлүштүрүлөт, бирок кезекте турган жарандарга кайсы батир кимге туура келерин алдын ала айтуу мүмкүн эмес.
Ошондой эле ал жарандар батирлердин актуалдуу бааларын МИКтин rasmiy.mik.kg сайтынан көрө алат.
Анын айтуусунда, баа саясаты бир топ факторлорго байланыштуу өзгөрүп турат.
“Эртең чарчы метрдин баасы канча болорун так айта албайбыз. Бул саясаттагы өзгөрүүлөргө, товарлардын баасына жана дүйнөлүк кырдаалга жараша өзгөрүп турат”, — деди Мырзагүл Сардарбекова.
